جوا الدرج
أحلام كتير مركونه
أفكار كتير مسجونه
بتصرخ تنادي في كل يوم
ياصاحب الدرج
أنا موجودة
ياساجن الأحلام
أزاى تعيش
وتسيب أحلامك
جوا درج مسجونه
-----
2
جوا الدرج صورة
علي ظهرها أسم وعنوان
علي ظهرها كلام حب كان
من حبيب فارق من زمان
الصورة بتبكي عيوني
والكلام بيصحي جوايا
الحب اللي كان
والأسم صبح لبنتي
وليه ياحبيبي أتغير العنوان
عارف هفضل أحبك
مهما يفرق بينا الزمان
-----
3
جوا الدرج حبة كلام
عني وعن الأيام
خايف لو يخرجو في يوم للنور
الناس تقول أحلام
أي كلام ملوش فايده
والأحسن أنه يرجع جوا الدرج
ومن تاني في هدوء ينام
-----
4
جوا الدرج ورقه وقلم وكتاب
وألبوم صور لأغلي أصحاب
وأجنده فيها مواعيد السفر
ومين فيهم يقدر يخفف عني
صوت من العذاب
ومين منهم قادر يقربني
من الأحباب
-----
5
جوا الدرج حلم كبير مسجون بقاله زمان
أني في يوم أكون أنسان
أعيش أنسان
ألاقي الحب في كل مكان
بيرسم في كل قلب ميت بستان
بيجمع القلوب في قلب واحد
مايعرف غير الحب والإيمان
---------------
نقاط
موضوع: داخل الدرج 
