من الاسباب اللي بتسبب النكد هو التوقع والانتظار مش انتظار كليب هيفا الجديد انه يجي علشان نشوف لابسة ايه المرة دي ها !!! عارفين الحركات دي... اللللللمهم
هاحكي قصة مستوحاااه من صديقة
ترررررررن ترررررررن نررررررررن
أ : الو...... " بصوت عادي جدا وطبيعي "
انا: ازيك يا ( أ )0 عرفت انك تعبانة خير حبيبتي؟
أ: ااااه اقولك ايه تعبانة بشكل والله انا ماقمت من السرير بقالي يومين
انا: يااه للدرجة دي!! طيب روحتى لدكتور؟؟
أ: لا اصلي كنت تعبانة فقولت استنى لحد مافوق شوية وروح بس ايه بقا صداع و مش باكل دانا خسييت يجي 3 كيلو " ياااااحلاوة دا انا بس في سري طبعا " ومش هاحكيلك وشيييي اتشفط عيييني دخلت لجوة ايدي مابقدرش اشيل حاجة .... والخ الخ
انا : اممم طيب ما انتي لازم تروحي لدكتور علشان تعرفي انتي فيكي ايه !!!... " وفي سري عمالة افكر معقول 3 كيلو علشان مش بتاكل خالص طيب لو كلت نص نص اخس 1 ونص؟ " ... لا لا الف سلامة عليكي يا قمر
أ : لا لا لو اقولك تعبانة قد ايه دانا امبارح بعملهم الفطار حسيت اني دايخة وكنت خلاص خلاص هاقع على الارض..... " انا في سري بردو الله!!! هى مش قالت ماقامتش من السرير بقالها يومين؟؟ " ...... ودخلت نمت ماقدرتش
اانا : ياااه معلش لا ان شاء الله كله هايبقا تمام ماتقلقيش و الاولاد عاملين ايه؟ " في محاولة بريئة مني اني اخرجها من موود التعب وال... احم احم النكد " دول واحشني جدا يا ( أ )
أ: الولاد؟؟؟ دول مطلعين عيني يا بنتي أول امبارح واحنا بنتغدى " ز " بنتي حكتلي على صحبتها اللي شدت شعرها و الميس بتاعتها ماعملتش حاجة ولا حتى ... الخ الخ ...... " ارجع تاني اقول في سري سبحان الله يعني بتاكل اهو امال خست 3 كيلو ازاي!!! " ....... بس عارفة ايه أكتر حاجة مزعلاني!!
انا : ايه يا ترى...... " المرة دي بقول لنفسي بالنوسبة للنكد" ......خيير؟
أ: تخيلي ماحدش سأل عليا خالص ولا واحدة من الشغل فكرت حتى انها تتطمن عليا مع انهم شايفني وانا عيانة يوم الخميس
انا : ايه دا معقول!!!!!!!! ياستي وانتي هاتاخدي ايه من سؤالهم ماتشغليش بالك المهم تطمنى على نفسك ......." نفس المحاولة البريئة لاني اهون عليها ".......... وترجعيلنا بالسلامة ان شاء الله
أ: طبعا انا اصلا خلاص مش عايزة اتعامل معاهم ,, دا أنا عرفت ان لما " س" غابت كل الناس اتصلو حتى الفراش لكن انا ولا حتى سؤال دا أنا سألت على " س " لما رجلها اتكسرت و " ف " لما مامتها تعبت و " ك " ويي وييي وييي بس انا اصلا مش مستنية منهم حاجة...... ( انا في سري: لااا من ناحية مش مستنية فدا شيء واضح جدا ) ......انا خلاص عرفت مين الصحاب ومين لا
انا : اهو يا ستي على الاقل عرفتي مين فعلا بيحبك بجد و.....
أ: اااه ايييوة انا اتعلمت فعلا وعرفت,, يادوب اميرة كلمتني امبارح وانهاردة وبس ماردتش عليها انهاردة ماكنتش قادرة
انا : طيب والله كويس هي اميرة اصلها انسانة كويسة و ......
أ : ااه بصراحة لكن الباقي لااا اه و هند كلمتني يوم الخميس وامبارح لكن ان الباقى كدة مايسألش دا كتيير
انا : اها طيب بصي هو ال......
أ : لا قبل مانسى ست نهال لسة متصلة قال امبارح تسأل عليا !! اتصلت الصبح كنت نايمة قامت اتصلت بالليل تاني انما غير كدة مافيش منهم واحدة تفكر ترفع سماعة التليفون "
طبعا وصل العدد لسبعة مثلا 5 فيهم سألو في اليومين و2 سألو مرة واحدة
وهو دا اللي اقصده بالتوقع والانتظار .... متوقعة اني لما اغيب يوم الكل هايتصل يسألني ماجتيش ليه وافضل مستنية ... مستنية... وكل دقيقة بتمر كل ما بنكد على نفسي لما افضل افكر في واحدة واحدة وماتكلمتش ليه هي سها مستكبرة تتكلم؟؟ طيب وندى انا اتخانقت معاها مرة بس المفروض اتصالحنا ولا ايمااان دانا كل يوم بكلمها يخربييييييييييت ام النكد يعني لكن لو انا عايشة يومي عادي والله حد اتصل خير وبركة وحاجة تفرح ماحدش اتصل دا مش هاياكل منى حتة ودا ينطبق على اي حاجة بقا
اللي يقول خطيبتي المفروض تكلمنى 5 مرات في اليوم واستنى دا لو ماحصلش هايتضايق ...البنت اللي تستنى هدية دهب من حبيبها وتلاقي جايبلها حاجة تانية طبعا هاتتغاظ وتتضايق مع انها قد تكون بنفس القيمة لكن توقعها وانتظارها لحاجة معينة وصلها لكدة انا رأي نسيبها عالله نتمنى الحاجة ونعمل اللي يساعد على تحقيقها ونسيبها لربنا اتحققت نفرح ونزأطط كمان والله بقا ماتحققتش قشطة بردو والحياة لسة حلوة يعني وتتعوض.....