بحبه يا بابا عااااااااااااااااا
فيه بنات بتقع ف مشكلة الحب
خارج الاطار الرسمى اللى هو الزواج يعنى
اللى هو مش بعتبره حب حقيقى
صدقينى يا بنتى
ده بيضحك عليكى
جارك و لا زميلك
و لا الولد اللى بتكلميه ع الشات و لا الفيسبوك
لو بيحبك بجد ما كانش يخرج معاكى
و لا يكلمك من ورا أهلك
ما هو بيحبنى و أنا بحبه
و حيتقدملى رسمى
طب أصبرى بعد ما يتقدم و يسأل عليه أهلك و تتخطبوا
و لو اتقدم الشاب ده فعلا للاسرة
غالبا بيترفض
لسببين
أولا مش كويس أخلاقيا و ده بيكون الأغلب
لانه لو انسان محترم فعلا
عمره ما كان يخون اهلها و يكلمها من وراهم
السبب التانى مادى
مش بقول عن الناس اللى حتطلب شقة 4 اوض و تتكلف بكذا و كذا
لا حتى الامكانيات البسيطة اللى تعين ع الحياة مش موجودة
و مش بيشتغل شغلانة كويسة تعيشهم ع الكفاف
طبعا فيه أسباب أخرى كتير بس هما دول الأهم
تبكى البنت و تصرخ
بحبه يا بابا
عاااااااااااااااااااااااااا
احنا عش العصفورة يكفينا
و بالحب حنكهر أى تحديات
(نكهر = نقهر بلغة البنات الرقيقة خصوصا لما تعيط )
و تقلهم حاموت نفسى لو ما اتجوزتهوش
يا ده يا اما بلاش
يا بنتى يا حبيبتى
هما اهلك دول اعدائك
انتى اغلى واحدة عندهم
و عايزين مصلحتك مش العكس
و لو هو كويس فعلا عمرهم ما حيرفضوا
ناس كتير عندت مع اهلها
و تزوجت رغما عنهم ناس مش كويسين
هما اللى اتبهدلوا و داقوا العذاب ألوان
و ف الاخر مالهمش غير أهلهم
بيرجعوا ليهم تانى ينجدوهم
و عندى حكايات كتير سيئة
بس انتى سمعتى حكايات اكتر منى
عن ناس قالت انها اتجوزت عن حب
و ف الاخر لعنوا اليوم اللى شافوا فيه بعض
و حتى لو اتجوزتوا عمره ما حيثق فيكى
لانك خنتى أهلك م البداية
ايه اللى يضمن له أنك ما تخونيهوش
مالكيش غير اهلك يا بنتى
عمرهم ما حيتغيروا ناحيتك مهما حصل
و عارفين مصلحتك اكتر منك
ألحقى نفسك
و توبى لربنا
و أبعدى عنه
اكسرى شريحة الموبايل
ماتكلميهوش تانى ابدا
و لو ليكى نصيب فيه حيجيلك
لكن سيبيه دلوقتى
عشان ربنا يرضى عنك
دلوقتى ربنا سترك
و ما حدش عارف باللى بينك و بينه دلوقتى
ما تستبديش بقى
ستر ربنا مش حيستمر ع طول
بدل ما ف النهاية
ربنا يكشف ستره
و ما تلاقيش حد يحبك بجد
و تلاقى نفسك وحيدة منبوذة م اهلك و الناس
و لا ينتهى الأمر بمصيبة و لا فاحشة و العياذ بالله
أنت ما تضمنيش التطور و التنامى ف العلاقة
دلوقتى كلام و لقاءات
بكرة ............
أنت فاهمة اكيد التطور الطبيعى للحاجة الساقعة
و الشيطان شاطر
و شياطين نفوسنا أشطر
أتقى الله عشان تلاقى الحب الحقيقى
و تنعمى و تسعدى
فمن ترك شيئا لله عوضه الله بخير منه
أفتكرى ديه كويس
و أدعى ربنا يرزقك الزوج الصالح
اللى يحبك بجد و يحافظ عليكى